حسبي علي اللي فرقوا بين قلبين

يوم اسألتني قالت من انت ومنين *** دار الحديث وطال معها نقاشـي


وناظرت فيها نظرة العين للعين *** واخفيت عنها حيرتي واندهاشـي


طفله بعد ماتمّمت عشرة سنين *** منطوقها يروي الكبـود العطاشـي


في وجهها بدر ٍ جمع ورد مع تين *** مِنور حلاه ولاغشاه الغباشـي


والشعر ليل ٍ لافترق صار ليلين *** مسترسل ٍ مابان فيـه انكماشـي


والعين عين اللي كفخ بالجناحين *** عين اشقر ٍ ماطاوع لكف لاشـي


قلت اسمعيني ياورود الرياحين *** أنا غريب ولاظلـم الليـل ماشـي


أنا بدوي ٍ يعشق البل والظين *** وبماكر اهل العـز باسـط فراشـي


أسوق ركبي مع رجال وفيين *** وانا لربعـي مثـل فـيّ الغواشـي


في لازمي يابنت ماقلت بعديـن *** وبلازمـي يابنـت ياقـو جاشـي


ماني خوي اللي عن الحق غاوين *** أهل الخنا واهل العلوم الهشاشي


وان عذربوا فيني من القل واشين *** ماجيت اساير كل نمّـام واشـي


الفقر ماعذرب رجال ٍ عزيزين *** لو يسكنون خيـام والا عشاشـي


والمال مايرفع نفوس الرديين *** لو مالهـم يمـلا كبـار الخياشـي


قالت وفيت وقلت ابسألك ذلحين *** منهم خوالك ؟ والا اقلك .. بلاشي


قالت بقول مثمن العلم تثمين *** خالـي فـلان وعجلـت بارْتباشـي


قلت اكتفيت وعقبها لاتقولين *** على عيوني مثـل حـوم الفراشـي


واقفيت مثل اللي غلط بالعناوين *** يبغا يكحلهـا وصابـه طماشـي


واللي تبيّن لي ولاحتاج تبيين *** شي ٍ قديم وكنـت عنـه متحاشـي


البنت هذي واظمن العلم تظمين *** بنت الهنوف اللي بها الفكر طاشي


اللي أشبهها بورد البساتين *** من عطرها الباهـي يزيـد انتعاشـي


واللي خطاويها على العرف والدين *** واللي طرفها بالغدر مايناشـي


واللي غلاها ساكن ٍ بين ضلعين *** واللي بطاريها يزيـد ارتعاشـي

عنها حدوني جامعين الملايين *** وانا خذلني فـي هواهـا معاشـي


قفّو بها عني ضحى يوم الاثنين *** وانا دموعي مثل وبل الرشاشـي


وحسبي على اللي فرقوا بين قلبين *** حتى غشا قلبي من الهم غاشي