ينام من هـو مايعـرف الهمومـي=وعيني اليا نامو حريب لهـا النـوم
الله يلـوم اللـي لحالـي يلـومـي=لاساهر سهري ولا هـوب مهمـوم
ماهوب مثلي يزعجه كـل يومـي=هم يلوج بداخـل الصـدر مكتـوم
لامبديـا أسـرار قلبـي لقـومـي=واللي بسر الغيب ماهـوب مفهـوم
أخاف أبوح السـر تبـدا الثلومـي=وتاقف على مكنون سري هل اللوم
عاهدت قلبـي مايبـوح العلومـي=ولايويـق بغايتـه كـل مـذمـوم
بالليل أساهر ساريـات النجومـي=والصبح أعدي بالنبا كـل مزمـوم
أوجس بقلبي مثل حـر السمومـي=ولا صفالي خاين الدهر لـو يـوم
يا سيف قم (لعّل) حظـك يقومـي=ولعل أبوك بساعة الحشر مرحـوم
النـار شبـة ياقـوي العـزومـي=وهات الدلال واترك النوم لرخـوم
خابرك يالطيـب ودود ورحومـي=قم سو مايبعد عنّـا كـل شغمـوم
فنجال بن ٍ ما يحضـره رخومـي=مبهرٍ من بيـن الأجـواد مقسـوم
أروحنـا بفـلاك الأيـام تـومـي=ولو يطول العمر فالأجـل محتـوم
روحي بيد فارض صلاتي وصومي=واللي بحبل اليسر ينجي لمضيـوم
الواحد اللـي نطلبـه كـل يومـي=منجي ليوسف عقب ماهوب مظلوم
دنيا الشقا ياسيف ماهـي تدومـي=كم واحد فيهـا مشيـح ٍ ومنجـوم
وأفرح إلى قالوا تقافـت غيومـي=على شفا الباطن وهو قبل ماسـوم
حيثه (مرابي كل) وضحا ردومـي=اللي بها زود على الطوق برشـوم
عسى تعلـه مرهشـات الوسومـي=يمطر (عليه) الوبل يوم بعـد يـوم
عشبه يغطـي نايفـات الحزومـي=فيه الزهر فوق الزماليق منضـوم
مخالـف النـوار غـادٍ سهومـي=والعشب من وبل المراهيش كيهـوم
فيه أم سالم مـن طربهـا تعومـي=تلفح بسمح الريش في كل مرجـوم
ومن الطرب في كل روض تحومي=وتقضي الدنيا زغاريـت وسجـوم
إن شافـت النـوار نبتـه يزومـي=ماسايلت عن حال معطا ومحـروم
الثلاثاء 14 سبتمبر - 7:37 من طرف عبدالله العجمي 2020
موضوع: ينام من هـو مايعـرف الهمومـي 
