هواجس لي جيت آبي النوم جتنـي

ترودني مـن كـل فـج ومنهـاج

لي قلت خلينـي لنومـي عصتنـي

وحطت حنايا الصدر مدهل ومسهاج

وهاجـت عليـه عبـرة جاذبتنـي

ونار بقلبي كن الاقشر على صـاج

من يوم شفت اسناعكـم خالفتنـي

وطاوعت بي دكات حاسد وهـراج

وسفحت دم القلب من فوق متنـي

بسيف الجفا ياحاجز القلب بسيـاج

اقسمت بالله من جفاكـم جفتنـي

سعادة الدنيـا وبسمـات الافـراج

اقسم بمن حطلك مع النـاس فتنـي

عن يمتك مهما حصل منك مانعـاج

يابو عيـون فـي الهـوى قيدتنـي

واخلاقك اللي بيض ابيض من العاج

ان ردك الله والليـالـي عطتـنـي
على هواي ارتاح قلب بـه اخـلاج

ون دام صـدك ذكرياتـي كفتنـي

اعيش معهـا دام للبيـت حجـاج

ان كان انا مخطـي فمـا سامحتنـي

نفسي تمج الحقد ياسيـد مـن داج

مـا ظنهـا يافاتـنـي عايفتـنـي

تشره وشرهتها لـي النـور وهـاج