سر يا قلم مالي على الصبر طاقة =

سر يا قلم مالي على الصبر طاقة = صبرن تعدى الحد ما عاد ينطاق
أكتب لمثلي قصته واشتياقه = في خطك الواضح على بيض الأوراق
قصة حزينن صافي المر ذاقه = ليا ذكر ما صارله خاطره ضاق
باقوبه الاصحاب والوقت باقه = وصار الضحية بين بايق وبواق
يمشي وهو ماحس في كسر ساقه = أمسى على ساقين واصبح على ساق
وهذي سوات الوقت شين اصطفاقه = والوقت لو يصفيلك ايام دراق
ان شان قطع عنك كل العلاقه = وان زان خلى لك مع الناس عشاق
والله خلق خلقن تحب اللباقة = كما خلق له خلق ما عندها اخلاق
احدن يعيش بخير واحدن بفاقه = واحدن يعيش ايام وايام يعتاق
واحدن معه حكمه وصبره ورواقه = سبحان من هو للمخاليق خلاق
لكن يا من معه عقل ووثاقه = ابنصحك كانك للأمثال تشتاق
لا تنخدع باهل العلوم الرقاقه = اللي سوالفهم توهك توهاق
صادق رجال يعرفون الصداقه = يقفون صفك يوم يبسات الارياق
ومن رغب في فرقاك فارغب فراقه = جاز الذي يجازيك بفراق بفراق
وتعلم التعشيق قبل السواقه = ولا تحسبنك بالدركسون سواق
ورزقك يجيك بدون تحضر بطاقه = وعند الله المعبود تقسيم الارزاق
يقولها للي جاير الوقت عاقه = ولا زال في غيبوبة الهم ما فاق
من انعزاقه ينادي باإنعزاقه = واللي يوده صار شوفه بالاشفاق
ما قال هذا القول قصدة طفاقه = ما قال هذا غير من نار الاشواق